السبت، أكتوبر 25، 2008

عادل شبرا

- يا عم أنا عارف إن حظى هباب طول عمرى!
- يا سيدى دلوقتى الطريق يتحرك وان شاء الله نوصل فى الميعاد
- سبحان الله ، يعنى يوم ما ربنا يكرمنى بعد اربع شهور من غير ولا حتة واحدة تتباع والخواجاية تكلمنى تطلب التمثال ده...اتاخر عليها كده...معادى كان من نص ساعة فى مصر الجديده يا حازم....بص الطريق!!!
- حيفتح...ان شاء الله حيفتح .
- أصل انت مش عارفها ...دى عجوزة ومجنونة شوية...يعنى ممكن تئفش وابقى ضعت كده.
- هى الدنيا مالها مقفلة معاك كده؟؟؟ ايه اللى حصل؟؟ فين ايام مارينا وشارم؟!
- هىهىهىهى انت لسه فاكر...مسئولية الولاد كبيرة يا حازم...كمان الشغل اليومين دول مبقاش زى زمان...محدش عنده قلب يدفع فى فن تشكيلى أو تمثال منحوت بمزاج...وانا معرفش اعمل حاجة الا انى ابقى فنان...انت عارف ان اتيليه المعادى اتقفل؟!!!
- امال بتشتغل فين دلوقتى يا احمد؟؟
- اخدت ورشة صغيرة فى الفسطاط...منطقة الحرفيين.
- ايه ده؟؟؟؟ بص اللى فى العربية جنبك....
- فين؟؟
- الزرقا اللى جنبك دى...
- يا بن اللذينا....ده يحي ...يا يحي...ازيك يا باشا
- أهلاً احمد ، حازم ، ازيكوا يا ولاد الـ.....
- هىهىهىهىهى تمام يا ريس
- ده انتو جيتولى من السما...
- خير ؟؟؟ فيه ايه؟؟؟
- عندى ميعاد مهم جداً والزحمة اخرتنى...تليفونى قطع شحن ومعيش شاحن عربية...خد...خد يا احمد حطهولى يشحن عندكوا شوية عشان اعرف اتكلم اعتذر...عندك شاحن؟؟؟
- عندك شاحن يا حازم؟؟؟
- آه ، فى التابلوه...
- يا سلام عليكو...خليه يشحن شارطة واحدة بس عشان اكلم الناس...
- هات طيب...استنى....بيشحن اهوه
- انا حاقف على جنب اريح الموتور شوية لغاية ما الشارع يمشى...العربية قديمة ومش مستحملة.
- ماشى يا يحى...اركن يا معلم...
- ايه ده...هو يحيى ركن وراح فين...انا مش شايفُه يا حازم
- اتلاقيه مزنوق ولا حاجة ولا نزل يجيب سجاير...ما انت عارفه...حريقه!
- آه صح...مع انه متدين وبيقولو التدخين حرام...
- الله....الطريق فتح...يلا شد...يلا عايز الحق الست
- آهه يا عم احمد....سوبر سونيك ان شاء الله :)
- يااااااااه....بص ايه اللى كان معطل السكة....لورى خابط فى اتوبيس...لا اله الا الله...
- عشر دقايق ونوصل ان شاء الله...
- حازم!!!! يحى يا حازم!!!
- يا نهار طين! انا نسيت خالص....طب وبعدين...ده احنا طلعنا الكوبرى وعديناه خلاص...
- مينفعش نرجع....معادى حيروح.
- بص...افتح تليفونه زمانه شحن...هو اكيد حيتكلم عليه عشان يعرف احنا رحنا فين.
- فكرة برضه
- دلوقتى اكيد حيتصل
- طيب لو مراته كلمته بقى....حنرد؟؟؟
- لا طبعاً...ام ولاده دى ست محافظة جداً ...ومعقده حبتين...زيه بالظبط وممكن متفهمش الموقف اوتزعل ان راجل غريب بيرد عليها.
- طيب
- اهه رن اهه...بس ده مكتوب : عادل شبرا
- يبقى واحد صاحبه اسمه عادل من شبرا...اكيد مش هوه...هو حيكون رقم عادى مش اسم متسجل
- طيب...ارد؟؟؟
- لا يا عم احنا مالنا...
- طيب
- وبعدين بقى....عادل شبرا ده مش راضى يبطل زن...حداشر مرة يتصل...ايه ابن البارده ده؟!!!!!!
- رد على امه يا عم شوفه عايز ايه
- ألو....ايه...مين حضرتِك؟؟ - فين يحيى؟؟؟ انت مين؟؟
- انا صاحبه يا آنسة وهو نسى تليفونه معايا. - صاحبه اسمك ايه يعنى هىىىىى هىىىىىى هىىىىىىى
- اسمى احمد...هو حضرتك مين؟ - انا سوزى والبيه صاحبك مدينى معاد اقابله ادام الهيلتون عشان نروح شقته وماجاش!!
- ايه؟؟؟ شقته؟؟؟ طيب هو ساب موبايله...اذا قابلته حاقوله انك مستنياه. - لا مستناهوش...ده انا جاية من شبرا...ومش عايزه عطله!!
- طيب اعمل ايه يعنى؟؟ - ما تيجى انت...هىىى هىىىى هىىىى
- مالك؟؟ ايه يا احمد؟؟؟ فيه ايه؟؟ قفلت ليه
- ده مش عادل شبرا....ابداً...اطلع على مشوارى بسرعة...
- انت بتعمل ايه يا مجنون....الموبايل....ترمى الموبايل فى النيل يا مجنون؟!!!!
- آه....يمكن عادل شبرا يغرق!

هناك 7 تعليقات:

blue-wave يقول...

بالفعل سيدتى
كثيرون يتخفون خلف عباءة الدين
وكثيرون مخدوعون
وكثيرون عائشون بالوهم حتى صدقوا انفسهم
لن اقول ابداع فما تخطه يداك قد تخطى كل مراحل الإبداع
تحياتى سيدتى

Mohamed ElGohary يقول...

كتير بيقولو إن الشعب المصري شعب متدين
أنا بقه بقول الشعب المصري يحب الفشخرة بإن سمعته زي الفل وإنه إجتماعيا يبقى ممتاز، بدين بقه، بفلوس، بلا أزرق، مش مهم الطريقة

أنا عموما ضحكت قوي من التناقضات، بس فعلا ده المجتمع وممكن جزء من الحكاية ده تنعكس على تناقضات جواية بحاول أحلها عشان أبقى متصالح مع نفسي

لماضة يقول...

هههههههههههههههههههههههههههه
جميله بجد
تصدقي انها بتحصل كتير وباشكال مختلفه
ولاد وبنات
بتسجل باسماء مختلفه
عشان لو حد قفش الموضوع
بس انتي جبتي كوكتيل حلو قوي
يعني خيانه زوجيه
على تناقض في الشخصيه الدينيه الغير سوية
يعني قلتي بيدخن وبيقول التدخين حرام
وهو ومراته محافظين جدا ومع ذلك بيخونها
انتي بجد ملكيش حل
ربنا يكرمك زي ما بتسعديني بكتاباتك يارب

she يقول...

الموجة الزرقا
شكراً على المبالغة :)
بس...على فكرة انا رأى فى الموضوع بتاع لمتدينين مش باين فى القصة دى

فى إحدى القصص ان شاء الله

شكراً مرة تانية.

she يقول...

انت فهمتنى يا محمد..هى التناقضات اللى جوانا...هى دى الفكرة.

شكراً يا محمد على انك صاحبى :)

she يقول...

انتى اللى جميلة يا لماضة
انا بتبسط اوى لما بشوفك هنا...بحس انك بتقرى بجد
شكراً جداً جداً

الشنكوتي الكبير يقول...

ههههههههههههههههههههههههههههه
هههههههههههههههههههههههههههههههه
هههههههههههههههههههههههههههههه
ههههههههههههههههههههه

وجون وجون وجون
لا بجد جامده
منظور لفكرة السم المتغير في الموبايل
بس منظور جديد تماما
لو حد رد بدالك يا جميل
حد مالهوش حكم عليك
لا هي مراتك
ولا حاجه
بس واحد مشفتهوش من زمان
واحد معدي وعرف خطيئتك وخيانتك
عرف ان انك مش شريف قوي زي ما بتقول
عرف انك لا مؤاخذه
واطي

عارفه فكرة ان حد يقرأ افكارنا هي قريبه من قصتك دي
هم عرفوا حاجه هو مخبيها عن كل الناس وعرفوها بغلطه وصدفه عبيطه قوي

رايهم ايه فيه
وياترى هو هيدور على الموبايل وعليهم ولا هيجري يشوف عادل شبرا

انا بحب شبرا قوي

الا هو انتي ملحقتيش تحفظي الرقم بتاع عادل ده كام بالظبط

ههههههههههههههههههههه

سلااااااااااااااااااااام