السبت، أكتوبر 01، 2011

ويك إند

مبحبش الويك إند
بكرهه
ولأ...مبرتحش من الشغل...
ولأ...مبحبش الهدوء...
ولأ...معنديش حد أخرج معاه وأكلمه ولا عندى روح أسترخى...ولا عايزة يبقى عندى حد أخرج معاه وأكلمه...ولا عايزة أسترخى
أسترخى يعنى أهدا...يعنى أفكر...يعنى الدنيا تبقى واضحة ف بالى والدوشة تهدا والصورة تبان وأشوف...
أشوف إنى لوحدى...من غيرك...

الويك إند يعنى أجازة...مش أنا آخد أجازة...يعنى أنا يتاخد منى أجازة...يعنى أنا أرجع مكانى...يعنى أنا أبقى "الست التانية" رسمى...يعنى أنا أبقى ع الكنبة أدام التليفزيون ببص للساعة عشان الوقت يعدى ويخلص الخميس اللى الناس كلها بتخرج فيه ده ويجى الجمعة اللى بتاخد فيه مراتك والعيال وتطلعوا العين السخنة ويجى السبت اللى بترجعوا فيه وتقضوا بقيته فى البيت...

أيام...مكررة...بتعدى...بالنسبة لك...بس أنا لأ...مبتعديش...
الويك إند مبتعديش...
الخميس بيعدى بالعافية...التليفزيون بيبقى شغال...بيونسنى بس مش بيونسنى...صوت...صور...حكايات بيمثلوها عشان يسلونى...ومش بتسلى...مش بركز فى الحدوتة اللى بتفرج عليها...بركز فى الحدوتة اللى عايشاها...بفكر...فيك...وفيها...وفى الزيارات العائلية اللى أنا مش جزء منك فيها...وبفكر ساعات إنك بتفتكرنى وإنت معاهم...بس بدمّع لما بحس إنك اأيد مش بتفكر...الرجالة مش بتفكر...صح...صح؟؟
والجمعة مش بيعدى خالص...بفكر إنك صحيت متأخر زي...بفكر إنك نزلت تصلى...وبفكر...ليه مش بتكلمنى بعد الصلاة أو قبلها..ما إنت أكيد بتبقى لوحدك...وبفكر إنك ممكن تفكر فيا وإنت سايق طريق السخنة...بس بفكر إن أكيد بتتكلم معاهم...مشغول بيهم...وبفكر إنك وصلت...وأكيد حتنزل المية...وأكيد حتلعب مع الولاد وضحككوا حيملا الدنيا...
وبشرب نسكافية وأدخن ميت سيجارة أطفى بيها نارى فتزيدها...وبدخل أحط راسى تحت المية عشان نص ساعة كمان تعدى وبفكر...حتعوم معاها؟؟ حتحضنها فى المية؟؟ عادى...ادام الناس...عادى حتضحكوا...عادى حتاكلوا سوا وترغوا وتبص فى عينيها...وعادى الساعات حتمر بسرعة ويقولولك ان نفسهم يفضلوا كام يوم...كل أسبوع فى الصيف ببقى مرعوبة تقولهم حاضر وتفضلوا أيام زيادة..ايام من اللى مش بتعدى دى...وكل يوم جمعة بتمنى الشتاء يجي عشان يبقى فيه مدارس ومينفعش ابداً انكم تسافروا الا كل شهر مرة...مع انى برضه مش بشوفك الجمعة...برضة جمعتى مش بتعدى...


برضه تليفونى مش بيرن...برضه مبتبعتليش رسايل...برضه مش بسمع صوتك اللى بيطمنى ويسكن وجعى ويسكت أفكارى ويهدى قلقى ويطبطب عليا ويدينى أهمية انا محتاجلها اوى...اوى...اووووووى...


وأسوأ ما فى الجمعة ليله...لانه ليل ساعته بسنة...وحدتة بتقتل...ظلامه بيوجعنى...بنام فى السرير وانا حاسة ان فيه وحش اسمه الأرق حيلتهمنى لانى فريسة وحيدة...ووحش تانى اسمه الغيرة بتقطعنى لأنى فريسة مستخبية...لأنى راضية بحتة بدل ما أرضا بكل...لأنى جزء من جزء من حياتك ولأنك كل جزء فى حياتى...ويطير أى نوم بتمناه كأنه الجنة ، بس لأنه حيضَيَع ساعات من الساعات الطويلة اللى بستناك فيها...اطلع البلكونة...اتفرج ع الشارع اشوف ناس..زيك وزيها وزي ولادكوا راجعين من خروجه او من سفر...عربيات بتركن وشنط بتتشال ودوشة عيال...وراجل...وعيلته...راجل...زيك...ابص للقمر ملقاهوش...ابص للسما...سما الجمعة...سماه بتقتلنى...لانى عارفة ان صبح السبت حيجى وبرضه مش حشوفك لما ترجع...


والسبت بيعدى...بيعدى زى ما يكون طن حديد معدى على ضهر سلحفة...وكل سبت اتغاظ منك...ابقى عايزة اضربك واشتمك واصرخ فيك...لانك قريب منى بس برضه مش معايا...لانك برضه لسه متصلتش ولسه مبعتليش حتى رسالة فاضية تطمنى عليك...انا مببقاش عايزة اطمن عليك..ببقى عايزة اطمن بيك...وبشغل نفسى بزيارة الكوافير استعداداً ليوم الحد...وشراء لوازم غدوة يوم الحد...وشرا قميص نوم جديد عشان يوم الحد...وتوضيب البيت ومكوى الملايات والفوط والمفارش...وبتعذب...بتعذب من آخر كام ساعة انتظار...بتعذب انى باخد شوية مش كل حاجة...بتعذب انك وحشتنى وبتقطع من غيرك...وبتمنى ابقى علن...وضوح...بتمنى امشى معاك فى الشارع ايدى فى ايدك والناس يسلموا علينا...بتمنى اشوفك فى اى منطقة مش بس عند مكان سكنى البعيد عن كل حى تعرفه...بتمنى ابقى فى حضنك كل يوم وانت نايم...بتمناك...


بس...بفكر...يا ترى...انهى احسن...ابقى الست اللى بتحب تجرى عليها كل ما تقدر ولو قليل...ولا الست اللى معاها على طول وانت عايز غيرها...ابقى الأداة ولا أبقى المغفلة...أبقى مضحوك عليا بحب مؤقت عشان يبقى ملاذ شغفك وشهوتك ولا مضحوك عليا عمر بحاله باخلاص مصطنع...


وباختار ابقى الأولى...باختار اكره الويك اند...

هناك 13 تعليقًا:

candy يقول...

"يا ترى...انهى احسن...ابقى الست اللى بتحب تجرى عليها كل ما تقدر ولو قليل...ولا الست اللى معاها على طول وانت عايز غيرها...ابقى الأداة ولا أبقى المغفلة...أبقى مضحوك عليا بحب مؤقت عشان يبقى ملاذ شغفك وشهوتك ولا مضحوك عليا عمر بحاله باخلاص مصطنع..."

الحتة دى خرافة !
بس اللى يغيظ جدااااااااا ، هو ليه أصلا يبقى فى اختيار بين الاتنين ؟؟
هو هو يبقى الواحد وهى تبقى النص ؟؟ وتتألم وتفكر وتحتار وتختار تبقى أنهى نص ؟ وكأن دا وضع مسلم بيه ؟؟؟

هى لازم تبقى الأتنين !
لالالالالالالالالالالالالالالازم !!!!!!!!
وغير كدة يبقى هى اللى برخص نفسها وكل بنات جنسها.

رشا ابو السعود يقول...

:)

كاندى...اهتمامك وقراءتك فوووووووق راسى..تسلميلى...بجد بتسعدينى :)

ليه؟؟

عشان هى الحقيقة كده...الرغبة كده...الشهوة كده...
الراجل - عادة- بيزهد اللى عنده ويجرى على المغامرة اللى فى الخفا...والراجل ده بيلاقى ستات اتسابت قبل كده لنفس السبب وبقت وحيدة ونفسها فى حنان راجل فبيعيشها الدور ده وهى بتقبل عشان يبقى فيه جزء من اللى نفسها فيه...وبكرهها للويك اند مراية لكرهها لنفسها...

موضوع ان واحدة ترخص بنات جنسها ده مبالغة احنا اخترعناها...كل واحد لازم تعز عليه نفسه...ولو نفسه هانت يبقى طز فى اى حاجة تانية...الحقيقة كفاية عليها عذاب نفسها..منشيلهاش بقيت البشرية...ولا ايه :)))

الشنكوتي الكبير يقول...

الخدعه
ابسط كلام يتقال عن الموضوع ده هو الخدعه
ان الراجل يخدع نفسه بأنه هيلاقي سعادته في جوازه تانيه مستخبيه يعني يقضي حياته بيكدب على مراته الأولى ومستخبي منها وخايف ينكشف وبيخدعها ومفهمها ان هي سر سعادته وحبيبته الوحيده وبيخدع ولاده منها وبيخدع الزوجه الجديده انها فعلا كانت الحلم اللي بيتمناه وانها الأمل في بكره وانها البيت اللي بيرتاح فيه وانه مش لاقي ده في بيته لكن قلبه الحنين مخليه مش عايز يهد البيت الأولاني


هي بقى الزوجه الأولى بتخدع نفسها ان جوزها طبيعي ومفيش حاجه غريبه فيه برغم ان اغبى ست في الدنيا تقدر تعرف التغيرات في جوزها وتشمه بغريزتها من اول لحظه

الزوجه التانيه بقى بتخدع نفسها برده انها مصدقه انه فعلا حبها هي واكتشف انها تملك اللي متملكهوش مراته وانها سر سعادته وان الحياه اللي هيعيشوها في السر دي هتقدر تتحملها وانها هتبقى سعيده معاه في لحظاتهم المخطوفه احسن من حياه كامله مبنيه على الخداع كأن دي مش مبنيه على الخداع

يعني كل واحد بيخدع وبيتخدع في الليله دي
انا رأيي ان الراجل مبيتجوزش زوجه تانيه في السر علشان الحب والمشاعر والكلام ده الا في ما ندر ويمكن مفيش اصلا خالص اكلام ده الموضوع بينحصر في الجنس او الخلفه او الفلوس سبب من التلاته دول بيجبره انه يتجوزها لأن بجوازته الأولى هو خلاص اشبع احساس الأستقرار عنده ومش هيدور عليه في واحده تانيه لكن بيضطر للجواز لو هي رفضت علاقه في الحرام او هو بيخاف من ربنا شويه يعني الموضوع عنده مجرد مصلحه عايزها منها لكن بيزوقها في عيونها بالحب والمشاعر
ورأيي ان الست لما تقبل تكون زوجه تانيه بيبقى لسبب من اتنين اما انها عمليه جدا وعارفه الدنيا وفاهمه انها كست محتاجه راجل جسمانيه ونفسيا وماديا راجل يصرف ويشيل مسؤليتها ويونسها ويعفها فبتبقى عارفه انها لازم تتجوز ولأن الرجاله القادرين على الجواز ماديا بالذات دلوقتي اصبحوا عمله نادره فبتضطر تقبل بواحد متجوز
او انها تكون عايزه تضحك على نفسها بجد او عبيطه بجد ومصدقها القصه الشهيره بتاعة انا اكتشفت اني بحبك انتي وان مراتي مش هي الحلم اللي انا حلمته واني لقيت فيكي الحب والحنان والشخصيه اللي بتمناهم طول عمري والكلمتين الحمضانين اياهم فتقع وتقنع نفسها انها هتنجده من القهر وبئر الحرمان اللي هو فيه ودي جوازها بيبقى غم دايما زعلانه انه بعيد عنها ومحرومه منه وفي نفس الوقت حنيتها السخيفه بتخليها مش قادره تاخد موقف وتقول انا عايزه حقي فيك بعكس الشخصيه اللي قبلها بتكون محدده هي عايزه منه ايه ومتفقه عليه من البدايه

واخيرا الزوجه المغفله وسامحوني في الكلمه لكن هي فعلا بتكون في غفله رهيبه عن جوزها وحياته وانه يوصل بيه الحال لزوجه جديده في السر مش بس مجرد علاقه عابره ولا نزوه هبله من بتوع الرجاله


سيبك بس من الرغي ده كله وكل سنه وانتي طيبه عقبال الكتاب الجديد يارب قريب سلامي ليكي ولولادك ولمامتك

سلاااااااااااااااااااااااام

رشا ابو السعود يقول...

كل اللى قصدته بالقصة دى انت عبرت عنه فى تعليقك...استاذ يا ايهاب :)

يسمع منك ربنا والكتاب الجديد ينزل بقى :)

الجنوبى يقول...

فعلا انا سعيد سعادة غامرة بمرورى من هنا لكن

اذا تبدلت الاوضاع واخذنا بدلا من المراة الاخرى -ولا اقصد الزوجة الاخرى-الرجل الاخر - ولا اقصد العشيق -كيف يمكنك ان تكتبيها



تحياتى وتقديرى

رشا ابو السعود يقول...

وانا كمان مبسوطة انك قريت...ومبسوطة اكتر بالفكرة اللى اهديتهانى :)

شكراً..ومنتظرة رايك

engineer moray يقول...

دايما بيغيظني الراجل الاناني لكن فالواقع طلعت الست البلهاء بتغيظ اكتر.تحياتي

رشا ابو السعود يقول...

هاهاها
بالظيط...تنرفز صح؟؟
تحياتى :)

Zawag alnaddy زواج النادى يقول...

السلام عليكم ورحمة الله وبركاته
جزاكم الله خيرا على هذا الموضوع الجميل وانتهز الفرصه واحب ان اوضح ان الزوجه هيا كل الحنان والعطف والأشواق لزوجها والزوج هوا كل الدنيا التى تفرح بها الزوجه للقأ زوجها يجب التعارف بينهم والله موضوع جميل ومشوق بارك الله فيكم ياشباب

عابر سبيل يقول...

الزواج فى السر ببساطة معناة فية حاجة غلط لانة فى السر مش فى النور لان الحاجات اللى بنخاف نعملها بنعملها واحنا مستخبين فى الضلمة فى السر والدايلاما بتاعة اكون زوجة اولى وعبيطة ولا تانية ومرغوبة ودة بيكون اختيار اما عشان الجنس او الفلوس (زى بقيت التاس اللى علقوا) الموضوع دة حلة ببساطة شرع ربنا الراجل اما يكون راجل بجد ويمارس شرع ربنا وحقة الشرعى ويتجوز فى النور وبعلم زوجتة اما يتنيل بستين نيلة ويتلم لانة ميقدرش يعدد الموضوع محتاج راجل مش ذكر وانا بعتقد ان الزواج فى السر علية علامات استفهام كتير وناس بتحاول تتحايل على الشرع عشان ببساطة همة مش قادرين يواجهوا مشاكلهم او احتياجتهم (المشروعة)

رشا ابو السعود يقول...

عابر سبيل..
تعليق رائع...
اولا لافتراض انه زوجة فى السر :))) حسن ظن من جميع اصدقائى القراء...
وانا سبت نوع العلاقة مش واضح عشان كل واحد يفسر زى ما هو حاسس...
ثانيا..اوجزت الفكرة...راجل!! مش

ذكر!!
هو ده..والرجولة صفة انسانية مش جنس...هى المفروض تبقى راجل وهو كمان ومراته المفروض تفوق من الغيبوبة...بالظبط زى ما قلت..ما حدش حابب يواجه احتياجاته المشروعة فبيعمل غير المشروع

عابر سبيل يقول...

شكرا على تعليقك

لكن على الرغم من ان دة قناعتى واعتقادى الا ان الموضوع نسبى ونظرى جدااا يعنى ينفع قضية تنظير بعيدة عن الواقع والواقع محتاج كتير عشلن يتغير اولا تربية المجتمع انة يقبل الزوجة التانية وكمان تربية المراءة على انها تقبل انها تكون زوجة تانية(وان كانت الظروف بتجبرها على الوضع دة على مضض) او ان الزوجة الاولى يكون ليها (جارة) شريكة فى الزوج
المهم ان الناس والمجتمع والاهل ان دة حرية شخصية واحتياجات لازم تلبى بطريقة مشروعة المهم
انا شايف لان المجتمع لم ينضج بما فية الكفاية ان الراجل ممكن يتجوز (بدون اعلان) الزوجة الاولى لكن فى الاخر يبقى الزواج شرعى يعنى بمعرفة اهل الزوجة ووجود ولى وكدة ودة لان راى او علم الزوجة الاولى لايفيد او يؤثر على الزواج من الناحية الشرعية ودة لحد ماربنا يكرم المجتمع ويفرز رجالة تقدر تواجة احتياجاتها

EZ Small Business Center يقول...

مجهود رائع وممتاز، ولكن يمكنك الاستفاده منه وكسب المال والأرباح من هذه المدونة عن طريق عرض بعض الإعلانات وذلك من خلال مشاهدة افضل كورس في الربح من المدونات والإنترنت على موقع كايرو هوم بيزنس كورس العمل من المنزل و الربح من الانترنت