الأربعاء، أكتوبر 19، 2011

فى التابلوه...

مبتردش...لحقت وصلت البيت؟؟ النهارده الخميس والدنيا زحمة...لحقت ازاى...اكيد مش فى البيت...طيب فين؟؟ بنت الـ.........
وصلت البيت يبقى خلاص كده...لغاية بكرة بالليل مش حاعرف اكلمها...وطبعاً سابت الموبايل فى تابلوه العربية...وانا اولع...اتحرق...انا مش مهم!!

انا مزودها...انا اديتها اكبر من حجمها..دى يدوبك صاحبتى مش حتى حبيبتى ولا عشيقتى...ولا هى اكتر من كده وانا صدقتها وصدقت نفسى ان احنا انتيم وبس...لا...هى صاحبتى الانتيم بس...بس برضه...التعود وحش...اتعودت احكيلها كل حاجة...اكلمها فى كل حاجة وفى اى وقت ...الا الخميس بالليل لحد الجمعة بالليل...تحطنى...قصدى تحط الموبايل فى تابلوه العربية عشان جوزها...

جوزها طبعاً ميقدرش الصداقة اللى بينا فكان لازم ابقى سر...

جوزها...طبعاً معاها دلوقتى طبعاً...وحيفضل معاها طول الليل...وحيصحوا بكرة مع بعض...حتعملّه قهوة..وحتحضرلهّ الفطار وحيخرجوا لحد بالليل وبعدين حيسيبها عشان يقابل اصحابه وهى حتكلمنى...

جوزها...الباشا المدّلع...معاه ست قمر..دماغ ايه وشخصية ايه وانوثة ايه ورقة ايه وست بيت فلة...مش زى انا...لوحدى..باكل لوحدى وبعمل كل حاجة لنفسى...اما اقوم اعمل كوباية قهوة...


كانت عايزاها قعدة البلكونة والقهوة والرغى وسيجارتين...وحشتنى...بس مخنوق انى كل شوية بمسك الموبايل بحكم العادة عشان اكلمها اقولها حاجة والاقيها مبتردش...أحا...وانا حياتى تبقى وقفة على واحدة كده؟؟ دى متخلقتش...
انا قلبى واجعنى...عايزها...عايز اكلمها...طب اشغل نفسى بحاجة...انزل اعدى على حد من العيال اصحابى نخرج ولا اى حاجة اعدى بيها الليلة...


كده الف بالعربية فى الروقان بلا اصحاب لا نيلة...مش عايز حد...
اسوق براحتى بسرعة واعلى صوت المزيكا كمان...هى مش معايا عشان تخاف من سواقتى ولا تقوللى اوطى المزيكا عشان تعرف تكلمنى...
لو كانت معايا كانت اتبسطت ...الجو حلو الليلة دى والشوارع هادية...
ايه ده...عربيتها مش تحت البيت...اما هى فين؟؟


لا لا لا بجد كده كتير...انا مالى...حصلى ايه...كل ده عشان واحشنى اتصال منها...كل ده عشان مش حعرف ارغى معاها براحتى واحكيلها على مغامراتى مع الجيران ولا ابن عمى الغلس ولا مشاكلى مع ابويا ولا البت اللى بترسم عليا فى الشغل...لا بجد كده مينفعش...انا غلطان اصلاً إنى سبت نفسى اتعلق بصاحبه واحده بس وبعدت عن سالم ومعتز وناس كتير عشان مكنتش بحب اخرج معاهم واضيع فرصة كلام كتير فى مكالمات كل يوم...انا اللى غلطان...ولازم اظبط دنيتى كده مش حينفع...
الصحاب كتير ...بنات وولاد...بس لو كلمت الشلة حيفشخونى عشان مطنشهم بقالى شهور ودلوقتى ظهرت تانى...
لا لا انا اتعرف على ناس جديدة...عشان بقى هى تبقى متواجدة او مطنشانى مش مهم ...حلاقى ساعتها ميت حد يونسنى...
يلعن ابو الوحدة اللى مبهدلة الواحد كده

انا حرجع البيت وحفتح الفيس بوك تانى


الله الله هو ده الكلام...اما انا عبيط صحيح...عندى تلتميت صاحب على الفيس بوك وقاعد زى المِطَلَقَة كده ابص على التليفون واتنهد...عيش يا عم...عيش

ايه ده...رسالة من اميرة...البت دى لذيذة...لو ترضى تخرج دلوقتى يبقى هايل...اهو اى حاجة تعدى الليلة وبكرة نبقى نشوف

عايزة نمرتى؟؟ اوبببا...لو اديتها النمرة حتتصل ادامها وحتعرف انى بعُط!
ايوة...حديها الخط القديم واكلم فودازفت يشغلوه تانى عشان ابقى فى الامان

قشطة!! النمرة اشتغلت واميرة حتقابلنى...قشطة يا ميرو...ميرو ضايعة أصلاً وفاقدة زى حالاتى

الساعة  واحدة...زمانها نامت صح؟؟ يعنى مش معقول حتبقى لسه بره وممكن تشوفنى مع ميرو فى العربية...كده تمام جداً...اخلى تليفونى فى البيت بقى وآخد معايا الخط بتاع ميرو بس

- ميرو: انت يا ولد...احنا قلنا نتمشى بالعربية ع الصحراوى..ممكن اعرف بنعمل ايه بقالنا ساعة لفلفة فى شيراتون؟؟
- حتفرق فى ايه...الشوارع فاضية زى الصحراوى واحنا بقينا الفجر...كملى بس الحكاية...ها...وبعدين...ايه اللى خلاكى ترجعيله تانى؟؟
- ميرو: اصله بصراحة طلع شهم...حاحكيلك عمل ايه...

البت دى صوتها مستفز...وكل شوية وهى بتحكى تخبطنى فى كتفى...بجد رخمة...

العربية لسه مش تحت البيت..ولا حتى راكنة فى الجراج اللى ورا...الف تانى ابص يمكن راكنة بعيد وانا مشفتهاش...كده اميرة حتاخد بالها...وانا تعبت...رجليا نملت من السواقة ودماغى وجعتنى من الرغى...وجعان...عايز آكل كبده بس مش من بنجر بتاع ميدان الجامع ...وجعلى بطنى آخر مرة...اكلمها أسألها آكل منين؟؟ يا دى الغباوة بقى...انا حوصل البت دى وحروح انام...


اليوم اهو عدى والنهار قرب يطلع...مش لاقى ركنة...لأ...لقيت..والحمد لله انها قريبة انا مش قادر امشى...


دى حتقع من الضحك لو حكيتلها على ميرو الخنيقة...مش حقولها فيس بوك وحوارات...حقولها قابلتها صدفة وانا بتمشى بالعربية...آه...وفيها ايه...ما احنا اصحاب بس وعادى يعنى...

أسيب بقى الموبايل ده فى التابلوه واطلع اشوف يمكن..يمكن كلمتنى...ولو متكلمتش..اهو بكرة جه وعقبال ما انام واقوم تكون ظهرت...




إهداء...الى الجنوبى

هناك 18 تعليقًا:

P A S H A يقول...

بقالي كتير ما قريتش حاجة جامده جداً كده
:)

ibhog يقول...

gripping style :)

رشا ابو السعود يقول...

Pasha, شكراً جداً :) يسعدنى جداً انك تقرا كتير..المدونة كلها يا ريت :)))



Ibhog, I've been a silent fan of your writings for long while now :) THANK YOU for reading and leaving me such a nice comment :)

الشنكوتي الكبير يقول...

انا نفسي اعرف بتجيبي الحكايات دي منين ############

انتي جبتي الأحساس منين
بصي يا ستي سواء الراجل متجوز او مش متجوز الراجل دايما بيعجب بالست اللي ناضجه ويا سلام لو ناضجه اكتر منه هتقوليلي ليه الله اعلم يمكن عقدة اوديب يمكن نقص عند الرجاله لكن ده اللي بيحصل بس المشكله ان الراجل بيخاف منها بيخاف انها تبقى مراته او حتى حبيبته رسمي هو ممكن يحبها بعد شويه غصب عنه لكنه بيبقى عايز يرفض ده الراجل دايما بيحب يحس انه اقوى واذكى وانضج من الست اللي بيحبها او متجوزها
علشان كده بدأت مشكلة الصحوبيه دي الراجل يتعرف بأي طريقه بقى على ست وغالبا بتكون متجوزه او ساعات مش متجوزه بس بتبقى سنها كبير ممكن في نفس سنه وممكن اكبر ساعات هو بيبتدي يتعامل معاها في البدايه بأخويه وصحوبيه لأنه عجبته دماغها وكلامها وارائها مع ملاحظة انه ممكن يرفض نفس الأراء دي من مراته وميحبش يسمعها
بعد شويه من التعود عليها في حياته يبتدي الأدمان بقى انه عايزها طول الوقت
فلو كان الموضوع بدأ صح بيبقى الطبيعي انه يفكر يتجوزها
لكن في الغالب الموضوع بيبقى مش صح يعني بتكون متجوزه او هو متجوز وبيبقى مش قادر يعترف لها انه بيحبها اصلا لكن اللي انا اتوقعه ان اكيد الست في الوقت ده بتحس انه مشاعره فيها حاجه لأن دايما بأكد ان ذكاء المشاعر عند الست اعلى بكتير قوي من خباثة الرجاله ونصاحتهم
فبتكون النتيجه غالبا الأنفصال هي بتقفل العلاقه خوفا على حياتها وسمعتها
او ممكن تحاول شويه تغير تفكيره وتلمحله دايما انه اخ وصديق وتأكد قوي على اخ وتفكره بحياتها وجوزها وولادها علشان يفهم ان السكه دي ممنوعه عليه
ونادرا بقى ان الست بتكون عندها استعداد لعلاقه غير اخلاقيه زي كده

الخلاصه بقى انك قدمتي كارثه بتحصل كتير جدا ومقدمتيش الحل فتحتي بس الجرح على الناس
انا عن نفسي معنديش حل علشان انا مجرد رجل اخر زي ما بيقولوا فأكيد وجهة نظري مش هتبقى موضوعيه
انا اتجوزت مراتي عن حب ودماغها بتعجبني بس مع ذلك ممكن اقبل اراء من ستات تانيه مقبلهاش منها هي ليه معرفش جايز علشان بحس اني مسؤل عنها اكتر من الستات دول بس ده يبقى معناه اني مش امين معاهم في رأيي
مش عارف انا خرجت عن الموضوع تقريبا
لكن عموما كالعاده طبعا افكارك واقعيه لدرجه مؤذيه
وربنا يستر علينا جميعا
سعيد جدا جدا بقرائتي عندك

سلاااااااااااااااااام

رشا ابو السعود يقول...

ممممم
اهو ده تعليق مقلق منك انت بالذات!

الافكار منين؟؟ من دماغى طبعاً :))

الحل؟؟ انا مش من حقى اقدم حلول..ولا ينفع...افتح جرح آه...كل واحد بيقرا بعينيه هو وكل قارىء بيقرر يشوف الموضوع ازاى...فيه ناس بتشوفه جرح واجعها بس كانوا ربطينه وفيه ناس بتشوفه قلة ادب وفيه ناس مش بتحسه اصلا لانه لا يعنيها...

المجروح بقى..يقرر حيتعامل ازاى وهو شايف حكايته ادام عينه...

يا رب تفضل تقرالى دايماً :)

الشنكوتي الكبير يقول...

يا رب تفضلي تكتبي على طول
اما بقى حكاية يتخاف مني دي فدي مرحلة عدت عليا زمان قوي والحمد لله عدت على خير ومش هشبع فضولك واحكي تفاصيل المهم ان القصه لمستني قوي ‏

reham يقول...

حلوه جدا جدا
صدفه لذيذه اللي خلتني اقرا النوت دي

Mohamed ElGohary يقول...

تسلم الأيادي :)

رشا ابو السعود يقول...

ريهام...شكرا...انتى اصلا كاتبة مميزة جدا...واسعدنى ان عجبتك القصة :)

جوهرى...تسلم يا ذوق :))))

Cars يقول...

مقال جميل

كتالوج السيارات يقول...

شكرا على المقال

Fast Quick Diet يقول...

مدونة جميلة

engineer moray يقول...

انا بيستفزني جدا القصص اللي بتنتهي من غير نهايه.بس فعلا عجبتني وخلتني اقيس اكتر من نهايه او احداث تانيه للقصه بجد اسلوب متميز جدا

sera يقول...

جميلة قوي اول مرة اكمل قراية قصة للآخر حسيت اني بسمع حد مش بفرأ على فكرة

sera يقول...

جميلة انا اول مرة أقرأ قصة لآخرها حسيت اني بسمع حد مش اني بقرأ قصة

رشا ابو السعود يقول...

باشمهندسة :)
اسعدتينى...الف شكر :)


سيرا..وهو ده اللى كنت قصداه بالظبط..ان القارىء يسمع افكار بطل القصة...شرفتى :)

EZ Small Business Center يقول...

مجهود رائع وممتاز، ولكن يمكنك الاستفاده منه وكسب المال والأرباح من هذه المدونة عن طريق عرض بعض الإعلانات وذلك من خلال مشاهدة افضل كورس في الربح من المدونات والإنترنت على موقع كايرو هوم بيزنس كورس العمل من المنزل و الربح من الانترنت

أمين الأمين يقول...

جميله جدا